TIRANË – Teksa mbetet edhe një muaj nga nisja e sesionit të ri parlamentar, kreu i Partisë Demokratike, Sali Berisha, ka shpallur aksionin e ri të opozitës, duke theksuar se mobilizimi qytetar për votën e lirë do të jetë në qendër të veprimeve të ardhshme politike.

Në një konferencë për shtyp, Berisha deklaroi se për sa kohë Edi Rama është në pushtet, shqiptarët nuk mund të votojnë si qytetarë të lirë. Ai e cilësoi kryeministrin si pengesën kryesore për zgjedhje të ndershme, ndërsa e akuzoi se ka ngritur një “diktaturë autokratike” të mbështetur në krim dhe korrupsion.

“Largimi i Ramës është kushti i të gjitha kushteve që qytetarët të vendosin me vullnetin e tyre për qeverinë e ardhshme,” u shpreh Berisha.

Duke e cilësuar qeverisjen aktuale si një narkoshtet, ai tha se aksioni opozitar nuk do të kufizohet vetëm brenda territorit të Shqipërisë, por do të shtrihet edhe në diasporë, ku sipas tij “përfaqësues të shtetit janë bërë armik i votës së lirë”.

“Do të bëjmë gjithçka për të mobilizuar shqiptarët në Shqipëri dhe jashtë saj, për t’u përballur me përfaqësuesit e narkoshtetit në diasporë,” tha Berisha.

Ai theksoi se qëndresa e përgjithshme qytetare është rruga e vetme për të rikthyer demokracinë, duke paralajmëruar një sezon politik të nxehtë dhe të mbushur me aksione opozitare.

Deklaratat e Berishës vijnë në një kohë të tensionuar politike, me Partinë Demokratike që vazhdon të mos e njohë legjitimitetin e qeverisë aktuale dhe kërkon zgjedhje të parakohshme nën një administrim të ri politik.