Gjykata e Posaçme ka vendosur lirimin nga burgu të Ilia Ndokës, kushëri i ish-deputetit socialist Arben Ndoka, i arrestuar në kuadër të operacionit “Revanshi”.

Sipas vendimit të gjykatës, ndaj Ndokës është caktuar masa “detyrim paraqitje”, duke e detyruar të paraqitet pranë autoriteteve çdo të premte të parë dhe të tretë të muajit.

Nga hetimet e SPAK, dyshohet se Ilia Ndoka ka ndihmuar me para dhe informacion kushëririn e tij, në përpjekjet për të identifikuar dhe ndëshkuar autorët e vrasjes së vëllait të këtij të fundit, Aleksandër Ndoka.

Ilia Ndoka ishte ndaluar fillimisht në Itali dhe më pas u ekstradua drejt Shqipërisë, ku ndaj tij rëndojnë akuzat për pastrim parash, pjesëmarrje në grup të strukturuar kriminal dhe kryerje veprash penale në kuadër të këtij grupi.

Çështja mbetet në hetim, ndërsa autoritetet vijojnë verifikimet për dokumentimin e plotë të aktivitetit të dyshuar kriminal.