Lulzim Basha, kreu i Partisë Demokratike Euroatlantike, ka prezantuar disa pika kryesore të programit të tij për luftën kundër korrupsionit, duke theksuar ndërhyrjet e shpejta dhe konkrete që synojnë përmirësimin e situatës në vend. Në një videomesazh të publikuar në rrjetet sociale, Basha shprehu angazhimin e tij për mbështetjen e plotë të institucioneve si SPAK (Struktura e Posaçme Kundër Korrupsionit dhe Krimit të Organizuar) dhe GJKKO (Gjykata e Posaçme Kundër Korrupsionit dhe Krimit të Organizuar).
Ndër pikat e tjera të programit, Basha përmendi krijimin e Njësisë së Zbulimit dhe Rikuperimit të Pasurive të Vjedhura, një organ i dedikuar për gjurmimin dhe rikthimin e pasurive të vjedhura nga zyrtarë të korruptuar. Ai gjithashtu propozoi ndryshime ligjore në Ligjin “Anti-Mafia” për të fuqizuar luftën kundër korrupsionit dhe abuzimeve të zyrtarëve të lartë, si dhe konfiskimin e pasurive të zyrtarëve të përfshirë në aktivitete korruptive dhe kontrata PPP abuzive.
“Korrupsioni mbetet gangrena më e madhe për shoqërinë dhe zhvillimin ekonomik të vendit. Shqiptarët kanë humbur mbi 10 miliardë euro për shkak të korrupsionit masiv, të shpërndarë në çdo hallkë të qeverisjes. Në programin tonë ne parashikojmë ndërhyrje të shpejta dhe konkrete për të luftuar korrupsionin: Ne do të themelojmë, sipas praktikave më të mira, Njësinë e Zbulimit dhe Rikuperimit të Pasurive të Vjedhura, për të gjurmuar kudo pasuritë e vjedhura të shqiptarëve dhe për t’ia kthyer ato arkës publike. Mbështetje e plotë dhe e gjithanshme si dhe bashkëpunim me SPAK dhe GJKKO. Ndryshime ligjore në Ligjin “Anti-Mafia”për të luftuar korrupsionin dhe abuzimet e zyrtarëve të lartë. Konfiskimi i pasurive të zyrtarëve publik të përfshirë në këto akte dhe PPP abusive. Heqje e imunitetit të deputetëve duke i hapur rrugë hetimit të plotë nga ana e SPAK të çdo zyrtari të dyshuar për korrupsion”, deklaroi ai.
