TIRANË – Në konferencën e përbashkët për shtyp me kryeministrin Edi Rama, Presidenti i Francës, Emmanuel Macron, komentoi mbi zhvillimet më të fundit në lidhje me luftën në Ukrainë dhe përpjekjet për paqe, duke theksuar se propozimi për armëpushim është një nismë amerikane që duhet respektuar, ndërsa reagimi i Rusisë, sipas tij, ka qenë zhgënjyes.

“Presidenti amerikan erdhi me një ambicie për të bërë paqe. Ishte një deklaratë e rëndësishme dhe SHBA duhet të respektohet për këtë. Ne reaguam menjëherë duke thënë se paqja duhet të jetë e fortë dhe e qëndrueshme,” deklaroi Macron.

Ai sqaroi se gjatë një vizite të përbashkët në Kiev me liderët politikë Merz dhe Strmer, kanë pasur një bisedë telefonike me Donald Trump, ku kanë përçuar qëndrimin e përbashkët për një armëpushim të mbështetur nga garanci sigurie për Ukrainën. Macron theksoi se Trump ka dhënë miratimin për këtë linjë veprimi, ndërsa presidenti i Ukrainës, Volodymyr Zelensky, ka shprehur gatishmëri për marrëveshje që të dielën.

“Ne jemi të gjithë për armëpushim, me garanci sigurie, dhe duhet vendosur presion mbi Rusinë. Trump ka dhënë një mbështetje të fortë. Pastaj, Putini reagoi duke propozuar një takim në Stamboll. Por sot, nuk kemi asgjë konkrete”, u shpreh Presidenti francez.

Në vijim, Macron nuk kurseu kritikat ndaj qëndrimit të presidentit rus Vladimir Putin, duke e cilësuar si “cinik” përballë përpjekjeve të përbashkëta ndërkombëtare për paqe. “Jam i sigurt që Trump, i merakosur për besueshmërinë e Amerikës, do të reagojë. Propozimi për armëpushim dhe për t’u ulur në dialog janë amerikanë dhe të rëndësishëm. Nuk mund të kenë një përgjigje negative nga Rusia,” shtoi Macron.

Në përfundim të deklaratës së tij, presidenti francez theksoi se vendi i tij dhe aleatët do të vazhdojnë të mbështesin Ukrainën, “që të rezistojë dhe të ketë paqe të qëndrueshme”.