Ministri i Financave, Petrit Malaj, gjatë një interviste në emisionin “E-ZONE”, sqaroi se politika e ndjekur deri më tani me bonuse për pensionistët po përfundon. Ai theksoi se qëllimi i qeverisë është që deri në fund të mandatit, pensioni mesatar të arrijë në 400 euro.

“Reforma e pensioneve është një sfidë për qeverinë. Skema e pensioneve dhe reformimi i saj kërkon sforco të madhe buxhetore. Ne jemi në rrugën e duhur. Që nga 2026 e në vijim, synojmë që pensioni mesatar urban të shkojë në 40 mijë lekë, pensioni urban i pjesshëm në 22 mijë lekë, pensioni rural dhe pensioni familjar në 18 mijë lekë, ndërsa pensioni për invaliditetin në 30 mijë lekë. Fondet për të arritur këtë objektiv janë parashikuar deri në vitin 2028”, – tha Malaj.

Ai sqaroi se vetëm për vitin 2026 kostoja e rritjes së pensioneve është 105 milionë euro, ndërsa deri në fund të vitit 2028, kostoja totale e reformës pritet të arrijë 1.7 miliardë euro.

Megjithatë, drafti ekonomik për vitin e ardhshëm nuk parashikon më bonuse në fund të vitit. Ministri Malaj theksoi se fokusimi do të jetë në rritjen e pensioneve në mënyrë të qëndrueshme dhe të planifikuar sipas projektbuxhetit afatmesëm.