Në një intervistë për Politico, komisionerja evropiane Marta Kos komentoi zhvillimet e fundit në Shqipëri, duke u ndalur te çështjet që lidhen me ish-zyrtarë të lartë dhe hetimet e SPAK, përfshirë rastet që përfshijnë Belinda Ballukun.

Kos vlerësoi progresin e vendit në reformën në drejtësi:

“Shqipëria ka bërë një punë ekselente dhe është në rrugën e duhur sa i përket reformës në drejtësi. SPAK po bën një punë shumë të mirë dhe është normale që të ketë raste të tilla në këtë fazë.”

Komisionerja nënvizoi gjithashtu se institucionet evropiane po monitorojnë nga afër zhvillimet në vend, duke përfshirë edhe rastet konkrete që janë në hetim, por theksoi se më e rëndësishme është mënyra se si autoritetet reagojnë ndaj tyre.

Kos shtoi se sfida kryesore për vendet kandidate mbetet jo vetëm krijimi i një kuadri të fortë ligjor, por edhe ndryshimi i perceptimit shoqëror ndaj korrupsionit:

“Mund të kesh legjislacionin më të mirë kundër korrupsionit, por nëse ai nuk pranohet nga shoqëria, atëherë kemi një problem tjetër.”

Deklaratat e saj vijnë në një moment kritik për Shqipërinë, ndërsa vendi vijon përpjekjet për integrim në Bashkimin Europian dhe rritjen e besimit qytetar ndaj institucioneve ligjzbatuese.