Një skemë mashtrimi e pazakontë është zbuluar në Milano, ku një nënë dhe djali i saj përfituan rreth 400 mijë euro duke tërhequr për dy dekada pensionin e një të afërmeje të ndjerë, pa raportuar kurrë vdekjen e saj.

E afërmja kishte ndërruar jetë në mars të vitit 2005, por përfituesit shfrytëzuan faktin që llogaria bankare ishte e përbashkët dhe vazhduan të tërhiqnin çdo muaj pagesat që i takonin të ndjerës.

Hetuesit e Guardia di Finanza zbuluan gjithçka pas një analize të thelluar të llogarive bankare, ku rezultoi se për vite me radhë ishin përdorur dokumente të falsifikuara identiteti, madje edhe formularë të nënshkruar me emrin e saj më shumë se një dekadë pas vdekjes.

Sipas autoriteteve, pikërisht këto falsifikime u mundësuan dy të dyshuarve të vijonin të përfitonin pensionin në mënyrë të paligjshme për gati 20 vite.

Tashmë nënë e bir përballen me akuzën për mashtrim të rëndë ndaj shtetit, ndërsa INPS (Instituti Kombëtar i Sigurimeve Shoqërore) ka arritur të rikuperojë një pjesë të parave. Pjesa e mbetur është sekuestruar nga policia financiare, e cila po heton për të zbardhur të gjitha përgjegjësitë dhe mundësinë e bashkëpunimit me persona të tjerë.