Presidenti i Shteteve të Bashkuara, Donald Trump, ka deklaruar mbi 1 miliard dollarë të ardhura gjatë vitit 2025, ku pjesa më e madhe e fitimeve lidhet me investimet në kriptomonedha. Të dhënat bëhen publike në raportin e tij financiar prej 927 faqesh.
Sipas dokumentit, rreth 635 milionë dollarë vijnë nga një meme-monedhë e lidhur me emrin e Trump, ndërsa më shumë se 500 milionë dollarë të tjerë burojnë nga platforma World Liberty Financial, e lidhur me familjen e tij dhe bashkëpunëtorë të afërt.
The White House ka mohuar çdo përfitim të paligjshëm nga posti presidencial, duke theksuar se bizneset e Trump administrohen nga familja e tij dhe se nuk ekziston konflikt interesi. Administrata ka deklaruar se objektivi mbetet zhvillimi i SHBA-së si një qendër globale për industrinë e kriptomonedhave.
Përveç sektorit të kriptove, Trump ka raportuar 122 milionë dollarë të ardhura nga resorti i golfit Doral dhe 77 milionë dollarë nga klubi Mar-a-Lago. Ai ka përfituar gjithashtu të ardhura nga produkte që mbajnë markën e tij, përfshirë orë, Bibla, atlete, parfume dhe kitara.
Ndërkohë, Melania Trump ka deklaruar 10.7 milionë dollarë nga një marrëveshje për një dokumentar dhe 6 milionë dollarë nga shitja e NFT-ve.
Raporti përfshin edhe rreth 86.5 milionë dollarë të ardhura nga marrëveshje ligjore me kompani të mëdha të teknologjisë dhe medias, përfshirë Meta, YouTube, ABC, CBS dhe X.
Sipas vlerësimeve të Forbes, pasuria e Donald Trump arrin në rreth 6 miliardë dollarë, ndërsa pas rikthimit në Shtëpinë e Bardhë ai ka mbështetur edhe më fort zhvillimin e industrisë së kriptomonedhave.
