Milano – Një shqiptar 49-vjeçar u bë protagonist i një operacioni të gjerë antidrogë në Milano, ku policia shkatërroi një rrjet të organizuar narkotrafiku.

Gjatë kontrollit, shqiptari u kap me “13,800 euro të fshehura në të brendshme”, të dyshuara si të ardhura nga trafiku i drogës, ndërsa bashkëudhëtari i tij italian mbante mbi një kilogram kokainë në makinë.

Operacioni, i koordinuar nga Policia e Shtetit dhe Prokuroria pas muajsh hetimesh dhe përgjimesh, përfshiu kontrolle në apartamente dhe ndalime në rrugë. Policia sekuestronte mbi 50 kg drogë, përfshirë hashash, marijuanë, kokainë dhe ketaminë, si dhe pajisje paketimi dhe një armë zjarri.

Në total, u arrestuan shtatë persona – gjashtë italianë dhe një shqiptar, duke shënuar një goditje të rëndësishme ndaj trafikut të drogës në rajonin e Milanos.

Autoritetet njoftuan se hetimet do të vazhdojnë për të zbuluar të gjitha degët dhe bashkëpunëtorët e rrjetit kriminal.