Kuzhinieri i famshëm turk dhe biznesmeni i njohur globalisht, Nusret Gökçe – i njohur si Salt Bae – ka publikuar një foto me Kryeministrin e Shqipërisë, Edi Rama, gjatë finales së UEFA Champions League që u zhvillua mbrëmjen e kaluar në Mynih të Gjermanisë.

Në një mbrëmje të mbushur me personalitete nga bota e sportit, biznesit dhe politikës, Nusret ka shpërndarë imazhe të shumta me figura të njohura, por ndaj Ramës ka treguar një vëmendje të veçantë.

Në përshkrimin e fotos ku shfaqet përkrah Kryeministrit shqiptar, ai shkruan:
“Më shumë se një mbret”, duke shoqëruar postimin me simbole si një kurorë mbretërore, një sy kundër syrit të keq dhe dy zemra të kuqe, një gjest që nënkupton respekt dhe afeksion të veçantë.

Nusret Gökçe është një nga figurat më të njohura në botën e gastronomisë dhe rrjeteve sociale. Ai u bë viral në vitin 2017 falë stilit të tij unik të përgatitjes dhe servirjes së mishit, dhe themeloi zinxhirin luksoz të restoranteve “Nusr-Et”, që tashmë operon në disa prej qyteteve më të mëdha të botës.

Rama dhe Nusret janë takuar edhe më herët në ngjarje të ndryshme ndërkombëtare, ndërsa ky postim nga finalja e Champions League sugjeron një raport miqësor dhe respekt të ndërsjellë mes tyre.