Kryetari i Partisë së Lirisë, Ilir Meta, ka publikuar në Facebook, një mesazh nga konferenca e mëparshme për shtyp, duke i bërë thirrje qeverisë që të ulë çmimin e karburanteve.

Ish-presidenti u shpreh se i duhet dhënë fund “rrjepjes së pamëshirshme” që po i bëhet popullit me çmimet e larta.

Meta u shpreh se çdo vit, nga xhepat e qytetarëve mblidhen 200 mln euro përmes taksës së qarkullimit të vendosur për automjetet.

Sipas tij, 20 mln euro shkojnë për mirëmbajtjen e rrugëve, ndërsa 180 milionë euro shkojnë për kostot e fryra të PPP-ve dhe konçensioneve.

“Grumbullohen nga xhepat e shqiptarëve 200 milion euro në vit nga taksa e qarkullimit por përdoren vetëm 20 milion euro për mirëmbajtje. Ku shkojnë 180 milion euro të tjera? Sigurisht që shkojnë në kostot e fryra të PPP-ve dhe konçensioneve. Ndal kësaj rrjepje të pamëshirshme.

Ne do të bëjmë çdo gjë. Çmimet do bien kur populli të ngrihet. Dhe populli do të ngrihet. Askush nuk ka pse të shqetësohet nga konferencat dhe denoncimet. Çdo denoncim është bërë me fakte, me prova dhe jo për qëllime politike. Është në interes të lartë të qytetarëve. Do të vazhdojmë çdo ditë, jo vetëm të bëjmë denoncime. Ora e shtetit po vjen, e ligjit po vjen”, tha Meta.