Ministri i Shtetit për marrëdhëniet me Parlamentin, Toni Gogu, komentoi për mediat pas përfundimit të seancës plenare, e cila zgjati vetëm 25 minuta, duke theksuar se shkak për këtë ishte veprimtarinë e opozitës në Kuvend.

“Ju e vutë re dispozicionin e kryetarit të Kuvendit dhe Kryeministrit, për shkak se Kuvendi i takon opozitës. Ne kemi ardhur për shkak se kemi detyrimin ndaj shqiptarëve që kanë votuar dhe debatin parlamentar është në qendër të Kuvendit dhe ne do ta sigurojmë që opozita të ketë të gjithë hapësirën e saj,” tha Gogu.

Ai akuzoi kreun e grupit parlamentar të PD-së për veprime të dhunshme gjatë seancës. “Nëse kreu i grupit parlamentar të PD tenton të qëllojë me librin e Kushtetutës kryeministrin, duke shfaqur dhunë verbale dhe fizike, po ju them që ne nuk do jemi asnjëherë të gatshëm për të qenë të pranishëm në seanca të tilla, sepse ky është parlamenti i shqiptarëve që duan të shkojnë në Europë. Ky është parlament që duhet të ndalet nga çdo shenjë dhune verbale. Mungoi debati parlamentar. Është opozita që ka ndërprerë programin që qytetarët donin të dëgjonin,” shtoi ministri.