Një kompani bioteknologjike kineze po zhvillon një trajtim të bazuar në një përbërës të nxjerrë nga farat e rrushit, për të cilin pretendon se në të ardhmen mund të ndihmojë në zgjatjen e jashtëzakonshme të jetëgjatësisë njerëzore, madje deri në 150 vjet, sipas “The New York Times”.

Bëhet fjalë për procyanidin C1 (PCC1), një përbërës natyror i grupit të polifenoleve, që gjendet veçanërisht në farat e rrushit.

Kompania me bazë në Shenzhen, Lonvi Biosciences, po zhvillon PCC1 si një trajtim që synon qelizat e plakura të organizmit, të njohura në shkencë si qeliza seneshente.

Këto qeliza janë dëmtuar dhe nuk funksionojnë më normalisht, por nuk largohen nga organizmi. Për këtë arsye, në literaturën popullore janë quajtur edhe “qeliza zombie”.

Me kalimin e moshës, qelizat seneshente mund të grumbullohen dhe të çlirojnë substanca që nxisin inflamacionin dhe lidhen me procese të ndryshme të plakjes.

Çfarë ndodhi te minjtë?

Studimi kryesor për PCC1 u krye fillimisht te minjtë. Studiuesit raportuan se përbërësi mund të pakësonte qelizat seneshente dhe të përmirësonte disa tregues të shëndetit dhe jetëgjatësisë te kafshët laboratorike.

Në një prej eksperimenteve, minj shumë të moshuar, rreth 24–27 muajsh, morën PCC1 në mënyrë periodike.

Studiuesit raportuan se trajtimi rriti me 64.2% jetëgjatësinë mesatare të mbetur pas fillimit të trajtimit. Ndërsa, kur llogaritej e gjithë jetëgjatësia e kafshëve, rritja ishte 9.4%.

Kjo e fundit është edhe burimi i shifrës 9.4% që është përdorur në raportimet rreth kompanisë.

Shkencëtarët po studiojnë nëse eliminimi i qelizave seneshente mund të ndihmojë në ngadalësimin e disa proceseve të plakjes dhe sëmundjeve të lidhura me moshën.

Megjithatë, PCC1 mbetet aktualisht një qasje eksperimentale. Rezultatet e vërejtura te minjtë janë interesante, por nuk mund të përkthehen drejtpërdrejt në një trajtim që zgjat jetën e njerëzve.

Për të përcaktuar nëse një trajtim i tillë është efektiv dhe i sigurt te njerëzit, nevojiten prova klinike shumëvjeçare, të kontrolluara dhe të pavarura. Prandaj, pretendimi për një jetëgjatësi njerëzore deri në 150 vjet mbetet një mundësi hipotetike dhe jo një rezultat i provuar shkencërisht.