Një ngjarje e rëndë ka ndodhur në fshatin Poroçan të Gramshit, ku si pasojë e shembjes së një masivi dheu nga kanali i një hidrocentrali në ndërtim, dy punëtorë kanë humbur jetën.

Sipas informacionit paraprak nga Policia, ngjarja ka ndodhur në fshatin Holta, ku gjatë punimeve në kantier, ka ndodhur rrëshkitja aksidentale e një masivi dheu që ka zënë poshtë shtetasit A. B., 22 vjeç dhe E. Ll., 32 vjeç, të cilët kanë ndërruar jetë në vendngjarje.

Grupi hetimor ndodhet në terren dhe po punon për zbardhjen e plotë të rrethanave të aksidentit, ndërsa pritet të hetohet nëse janë respektuar masat e sigurisë në kantier.

Ngjarja ndodh vetëm një ditë para zgjedhjeve të 11 majit, në një kohë kur strukturat shtetërore janë në gatishmëri të lartë. Drejtori i Përgjithshëm i Policisë, Muhamet Rrumbullaku, dhe drejtues të tjerë të institucioneve kanë bërë thirrje për kujdes maksimal dhe përkushtim në respektimin e ligjit, jo vetëm në procesin zgjedhor, por edhe në menaxhimin e situatave të emergjencës si kjo.