Një person ka mbetur i vrarë pasi kërcënonte qytetarët me thikë në Moers, një qytet afër Duisburg dhe Düsseldorf në Gjermani. Ngjarja ndodhi kur një 26-vjeçar gjerman u përpoq të sulmonte efektivët e policisë me dy thika në dorë.

Sipas raportimit të Associated Press (AP), policët ndërhynë dhe, për të neutralizuar kërcënimin, hapën zjarr ndaj tij. Si rezultat, personi u plagos rëndë dhe më pas ndërroi jetë nga plagët e marra.

Ngjarja vjen vetëm pak kohë pas një sulmi tjetër të dhunshëm me thikë që ndodhi të premten mbrëma në një festival në Solingen, ku tre persona u vranë dhe tetë të tjerë u plagosën. Për këtë incident, autoritetet dyshojnë se sulmuesi është një ekstremist islamik nga Siria, i cili më pas u vetëdorëzua në Polici.

Këto ngjarje kanë shkaktuar shqetësim të madh në Gjermani, duke ngritur pyetje për sigurinë publike dhe përballjen me ekstremizmin.