Vatikan – Papa Leo ka vënë në pikëpyetje koherencën e politikave të Donald Trump me mësimet e kishës katolike, duke e kritikuar ashpër për qëndrimet e tij mbi emigracionin dhe dënimin me vdekje.

“Dikush që thotë se jam kundër abortit, por jam dakord me trajtimin çnjerëzor të emigrantëve në Shtetet e Bashkuara, nuk e di nëse kjo është pro-jetë,” u shpreh Papa para gazetarëve, duke i kujtuar Shtëpisë së Bardhë se mësimet e kishës mbrojnë jetën nga ngjizja deri në vdekjen natyrore.

The Guardian raportoi se Shtëpia e Bardhë e ka justifikuar qëndrimin e Trump, duke theksuar se ai u zgjodh mbi bazën e premtimeve të tij për deportime masive – një çështje që ka ndezur ndarjet politike mes votuesve amerikanë.

Papa u pyet gjithashtu lidhur me vendimin e kryedioqezës së Çikagos për të nderuar me një çmim senatorin demokrat Dick Durbin, i cili ka mbështetur të drejtat e abortit. “Është shumë e rëndësishme të shqyrtohet puna e përgjithshme që ka bërë senatori. E kuptoj vështirësinë dhe tensionet, por duhet parë më gjerë, duke marrë parasysh të gjitha çështjet që lidhen me mësimet e kishës,” tha ai.

Duke shtrirë më tej argumentin, Papa Leo theksoi se qëndrimet për dënimin me vdekje janë po aq kontradiktore:
“Dikush që thotë se jam kundër abortit, por thotë se jam në favor të dënimit me vdekje, nuk është në të vërtetë pro jetës.”