Hollywood – Familja më e famshme e Springfield nuk është zhdukur kurrë nga ekrani i vogël, por pas 20 vitesh mungesë, ata do të rikthehen edhe në kinema.

20th Century Studios ka njoftuar se filmi i dytë i gjatë për The Simpsons do të publikohet më 23 korrik 2027, saktësisht 20 vite pas premierës së filmit të parë, që u shfaq më 23 korrik 2007.

Lajmin e shoqëroi një imazh i Homer Simpson-it, i nënshkruar nga krijuesi Matt Groening, ku ai shihet duke mbajtur një petullë të zbukuruar me numrin dy. “Homer është kthyer për më shumë” ishte mbishkrimi i vetëm në rrjetet sociale.

Aktualisht nuk ka detaje mbi fabulën, skenaristin apo regjisorin, por pritet që stafi i serialit të luajë një rol kyç në këtë projekt.

Filmi i parë i vitit 2007, me regji nga David Silverman, pati një sukses të jashtëzakonshëm: me një buxhet prej 75 milionë dollarësh, arriti të arkëtonte 536 milionë dollarë globalisht.

Duke qenë se The Simpsons është seriali i animuar më jetëgjatë në histori dhe një nga asetet më fitimprurëse të Disney-t, pritshmëritë për filmin e dytë janë të larta. Fansat nga e gjithë bota do të kenë arsye të rikthehen në kinematë për aventurat e reja të Homerit, Marge, Bartit, Lisës dhe Maggiet.