Të shtëna me armë zjarri janë regjistruar gjatë një feste familjare për 4 Korrikun në lagjen Coney Island të Bruklinit, në Nju Jork, duke lënë të plagosur të paktën tetë persona, përfshirë katër fëmijë.

Sipas mediave të huaja, një person i veshur tërësisht me të zeza dhe me maskë në fytyrë ka hapur zjarr ndaj të pranishmëve dhe më pas është larguar me shpejtësi.

Sipas Policisë së Nju Jorkut (NYPD), ngjarja ndodhi rreth orës 22:35 të së shtunës, kur një familje po festonte në oborrin e banesës. Sulmuesi dyshohet se iu afrua gardhit përgjatë Surf Avenue dhe qëlloi disa herë drejt turmës para se të arratisej.

Në vendngjarje u gjetën tetë të plagosur: katër djem të moshave 6, 7, 12 dhe 14 vjeç, dy gra të moshës 21 dhe 25 vjeç, si dhe dy burra 33 dhe 37 vjeç.

Autoritetet bënë të ditur se gruaja 21-vjeçare dhe burri 33-vjeçar janë qëlluar në gjoks, ndërsa fëmija 6-vjeçar në bark. Tre fëmijët e tjerë janë goditur në këmbë. Gruaja 21-vjeçare ndodhet në gjendje kritike, ndërsa të plagosurit e tjerë janë jashtë rrezikut për jetën.

Kryetari i Bashkisë së Nju Jorkut, Zohran Mamdani, e dënoi ashpër sulmin, duke deklaruar:
“Nuk ka vend për një dhunë të tillë në qytetin tonë. Nuk do ta tolerojmë dhe do ta luftojmë me çdo mjet që kemi në dispozicion. Ndërsa ndajmë dhimbjen me familjet e të plagosurve, duhet të angazhohemi që çdo festë dhe çdo ditë pushimi të jetë e sigurt për qytetarët.”

Policia ende nuk ka bërë të ditur identitetin e viktimave dhe nuk ka konfirmuar motivin e sulmit. Sipas komisioneres së NYPD-së, Jessica Tisch, nuk ka pasur asnjë konflikt apo debat para të shtënave.