Dy operacione antidrogë, të quajtura “Procesi” dhe “Furia”, janë zhvilluar në Lezhë, ku janë kapur rreth 200 kg kanabis. Si rezultat, pesë persona janë arrestuar në lidhje me veprimtarinë kriminale të kultivimit dhe prodhimit të kanabisit.

Trafikantët kishin përshtatur dy magazina për kultivimin e kanabisit, një prej të cilave u zbulua nga blutë e Lezhës në fshatin Shtuf të Mirditës. Gjatë kontrollit në një banesë të pabanuar, policia sekuestruan 108 kilogramë kanabis. Për këtë rast u arrestuan katër persona: Pjetër Çurgu, 27 vjeç; Artur Moli, 39 vjeç; Preng Moli, 71 vjeç; dhe Mark Moli, 67 vjeç, të gjithë banues në Balldre, Lezhë dhe Kaçinar, Mirditë. Të arrestuarit dyshohen si autorë të kultivimit dhe prodhimit të kanabisit që u gjet në proces tharjeje.

Në kuadër të operacionit “Furia”, në fshatin Gjonbardhaj, Kashnjet, gjatë kontrollit të ushtruar në një stallë bagëtish, u gjetën dhe u sekuestruan rreth 92 kilogramë lëndë e dyshuar narkotike kanabis sativa. Në këtë rast, policia arrestoi Gjovalin Markun, 46 vjeç, banues në Shkodër.

“Në kuadër të operacionit ‘Procesi’, njësia administrative Kaçinarë, Mirditë, gjatë kontrollit në një banesë të pabanuar u gjetën qindra bimë në proces tharjeje me peshë totale 108 kilogramë kanabis,” njoftoi policia.

Puna për identifikimin dhe kapjen e personave të tjerë të përfshirë në këto dy raste të veprimtarisë kriminale të kultivimit dhe prodhimit të kanabisit vijon në bashkëpunim me Prokurorinë. Materialet procedurale iu referuan Prokurorisë për veprime të mëtejshme.