Policia e Tiranës ka finalizuar me sukses operacionin e koduar “Imazhi”, duke zbuluar dhe goditur dy raste të shtrëngimit me anë të kanosjes për dhënien e pasurisë.

Rasti i parë: Shantazh përmes TikTok

Në një prej rasteve, është arrestuar 27-vjeçari Fadil Tafa dhe është proceduar penalisht 25-vjeçarja L. M.. Ata dyshohet se kanë kërcënuar një 33-vjeçar duke i kërkuar 1000 euro në këmbim të fshirjes së disa postimeve në TikTok, të cilat preknin jetën e tij private.

Sipas Policisë së Shtetit:
“Si rezultat i operacionit u arrestua shtetasi F. T., 27 vjeç, si dhe u procedua penalisht shtetasja L. M., 25 vjeçe, pasi në bashkëpunim me njëri-tjetrin, kanë kanosur një 33-vjeçar, për dhënien e shumës 1000 euro, që të fshinin disa foto/shkrime të jetës së tij private nga rrjeti social ‘TikTok’.”

Rasti i dytë: Arrestimi i 21-vjeçarit për shantazh

Në një tjetër rast, policia ka vënë në pranga 21-vjeçarin L. H., i cili akuzohet për shantazh dhe kërcënim për dhënien e pasurisë. Arrestimi i tij u bë pas një kallëzimi të bërë më 14 mars.

Policia po vijon hetimet për të zbuluar nëse ka persona të tjerë të përfshirë në këto skema të shantazhit dhe kanosjes.