Një orë xhepi prej ari, që i përkiste Isidor Straus, një prej pasagjerëve më të pasur të Titanikut, është shitur në ankand për 1.78 milionë paund, duke vendosur një rekord të ri për sende të këtij lloji.

Isidor Straus dhe gruaja e tij, Ida, humbën jetën më 14 prill 1912, kur Titaniku u përplas me një ajsberg gjatë udhëtimit nga Southampton në Nju Jork. Trupi i tij u nxor disa ditë më vonë nga Atlantiku, dhe ndër sendet e tij ishte kjo orë xhepi prej ari 18 karatësh, e cila ndaloi në 02:20, momentin e mbytjes së anijes.

Objekti, i dhuruar nga Ida për ditëlindjen e 43-të të bashkëshortit në vitin 1888 dhe i gdhendur me inicialet e tij, u trashëgua brez pas brezi dhe më vonë u restaurua plotësisht. Së bashku me orën, një letër nga Ida Straus u shit për 100,000 paund.

Shuma e 1.78 milion paundëve tejkalon rekordin e mëparshëm, i cili mbahej nga një tjetër orë xhepi, shitur vitin e kaluar për 1.56 milion paund, që i përkiste kapitenit të një anijeje që shpëtoi mbi 700 pasagjerë të Titanikut.