Policia e Kosovës ka nisur hetimet në lidhje me shpërndarjen e disa pamfleteve kërcënuese në komunat veriore të vendit. Këto pamflete përmbajnë mesazhe që nxisin urrejtje dhe përçarje, dhe janë gjetur në disa lokacione në veri. Zëvendësdrejtori i Policisë për veriun, Veton Elshani, ka konfirmuar incidentin, duke theksuar se për momentin nuk ka të dyshuar të identifikuar. Rastin e ka marrë në shqyrtim Prokuroria Speciale e Kosovës, duke e cilësuar si “Nxitje e urrejtjes dhe përçarjes.”

Elshani ka bërë të ditur se hetimet janë në fazat fillestare dhe po punohet për të ndriçuar rrethanat dhe autorët pas kësaj fushate kërcënuese. Fotografitë e pamfleteve, të cilat janë ngjitur në vende të ndryshme në orët e para të së premtes, janë përhapur gjerësisht në rrjetet sociale.

Në pamfletet, shfaqet fotografia e Milan Radoiçiqit, personi i dyshuar për organizimin e sulmit në Banjskë, si dhe anëtarë të tjerë të grupit të tij. Mesazhi i tyre është i qartë dhe kërcënues: “Të gjithë jemi Milana dhe vëllezër nga Banjska. Ju okupatorë zgjoni egërsira, ju presim në veri. Komandant, vetëm thuaj, fluturojmë si plumba!”. Ky veprim ndodh vetëm dy ditë pasi Prokuroria Speciale ngriti aktakuzë kundër 45 të pandehurve për sulmin e 24 shtatorit në Banjskë, ku mbeti i vrarë rreshteri i Policisë së Kosovës, Afrim Bunjaku.

Policia vazhdon të hetojë për të identifikuar personat e përfshirë në shpërndarjen e këtyre pamfleteve dhe për të shmangur përshkallëzimin e mëtejshëm të tensioneve në veri.