Një situatë shqetësuese për shëndetin e futbollistit Lorenc Trashi është regjistruar gjatë ndeshjes së Kategorisë së Parë mes Besëlidhjes dhe Korabit.

Futbollisti i vendasve, gjatë pjesës së parë, ka pësuar një shtrëngim në gjoks dhe është rrëzuar në fushë, duke shkaktuar panik te të pranishmit.

Menjëherë, stafet mjekësore të të dyja skuadrave kanë hyrë në fushë dhe janë kujdesur për ish-futbollistin e Kombëtares, i cili më pas e ka kaluar gjendjen e vështirë.

Megjithatë, është vendosur që Trashi të transportohet me urgjencë drejt spitalit, si masë paraprake për të mos rrezikuar shëndetin e tij.

Pas 6 minutash ndërprerje, skuadrat kanë marrë miratimin e mjekëve se gjithçka ishte në rregull dhe loja ka rinisur.

Në momentin e ndërprerjes, ndeshja ishte 0-1 në favor të skuadrës mike të Korabit.