Pas humbjes së shtëpisë së saj në Malibu gjatë zjarreve shkatërruese që goditën zonën e Los Angeles-it në fillim të këtij viti, Paris Hilton ka realizuar një nga blerjet më të bujshme të pasurive të paluajtshme në Beverly Hills.

Sipas The Wall Street Journal, trashëgimtarja dhe CEO-ja 44-vjeçare e 11:11 Media, ka blerë rezidencën e mëparshme të aktorit të njohur Mark Wahlberg në zonën elitare të Beverly Park, për shumën prej 63 milionë dollarësh. Transaksioni është kryer nëpërmjet kompanisë Hilton Hilton, me përfaqësues ligjor dhe negociator Barron N. Hilton, vëllai i Parisit.

Rezidenca, që shtrihet në rreth 30,500 metra katrorë, është një përfaqësim i luksit ekstrem dhe shijeve ekstravagante: ajo përmban 12 dhoma gjumi, 20 banjo, një kinema private, bibliotekë dykatëshe, palestër moderne, kantinë vere, dhe një hyrje madhështore me shkallë të dyfishta që të kujton pallatet mbretërore.

Jashtë, prona ofron një pishinë në stil resorti me rrëshqitëse uji, fushë tenisi dhe basketbolli, park për skateboarding, fushë golfi me 5 vrima dhe driving range – të gjitha të menduara për jetesë të relaksuar por aktive. Prona përfshin gjithashtu një shtëpi të veçantë për miqtë, duke shtuar intimitetin dhe komoditetin për familjen Hilton-Reum.

Kjo blerje vjen vetëm pak muaj pas tragjedisë që goditi Paris Hilton-in dhe bashkëshortin e saj, Carter Reum, të cilët humbën shtëpinë e tyre në Malibu gjatë zjarreve masive që shkatërruan dhjetëra prona në Kaliforni.

Me këtë rezidencë të re, Paris jo vetëm rikthen një ndjenjë stabiliteti pas humbjes, por konfirmon njëherazi statusin e saj si një nga ikonat e stilit të jetesës luksoze në Hollywood.