Drejtori i Mbikëqyrjes Financiare në Bankën e Shqipërisë, Denis Dërralla, ka deklaruar sot se Shqipëria është e harmonizuar me të gjitha direktivat dhe rregullat evropiane që lidhen me kuadrin ligjor të pastrimit të parave. Kjo është vërtetuar edhe në progresraportin e Komisionit Europian, ku theksohet se ka mbetur vetëm disa detaje për përafrimin e plotë të kuadrit rregullativ. Dërralla bëri këto komente gjatë një seance të Komisionit parlamentar për “Parandalimin e pastrimit të parave dhe korrupsionit transnacional.”

Në lidhje me eficiencën e ligjeve dhe rregullave të miratuara, ai theksoi se, edhe pse është bërë progres, ka ende shumë për të bërë. Ai vuri në dukje se pas dy vjetësh, Shqipëria doli nga lista gri për pastrimin e parave, pasi u verifikua përparimi i dukshëm në drejtim të forcimit të institucioneve që luftojnë pastrimin e parasë. Sidoqoftë, problemi kryesor mbetet përdorimi i parave në dorë (cash), i cili ndihmon në qarkullimin e parasë së pisët.

Dërralla informoi se Banka e Shqipërisë ka miratuar strategjinë kombëtare për pagesat e vogla dhe llogaritë bazike që nga viti 2020, duke mundësuar një ulje të përdorimit të parasë fizike. Ai theksoi se një ndër prioritetet është parandalimi i transaksioneve me para në dorë, duke rekomanduar një sistem të detajuar për deklarimin e të ardhurave personale. Kjo do të ndihmonte në identifikimin e burimit të fondeve dhe në uljen e mundësisë për pastrim parash.

Ai gjithashtu theksoi se këmbimi valutor, përfshirë përdorimin e kriptovalutave, nuk nënkupton pastrimin e parasë. “E rëndësishme është reduktimi i transaksioneve cash, si masë për të luftuar paranë e pisët,” tha ai.