Partia Demokratike ka ngritur shqetësimin për nivelin e lartë të procedurave të prokurimit publik të klasifikuara me indikatorë risku “Red Flag” në bashkitë e vendit, duke iu referuar monitorimit të Open Procurement Albania për gjashtëmujorin e parë të vitit 2026.
Në një deklaratë për mediat, zëdhënësja për Antikorrupsionin në PD, Genta Vangjeli, tha se të dhënat paraqesin një panoramë shqetësuese, ku sipas saj miliarda lekë nga taksat e qytetarëve janë të ekspozuara ndaj procedurave që mbartin rrezik për mungesë konkurrence, favorizim dhe përdorim joefektiv të fondeve publike.
Sipas PD-së, Bashkia Kamëz paraqitet si rasti më kritik në nivel kombëtar. Nga një fond limit prej 2.37 miliardë lekësh, rreth 1.23 miliardë lekë, ose 51.8%, lidhen me procedura të klasifikuara me “Red Flag”, ndërsa 42 nga 96 tenderë janë konsideruar problematikë.
Partia Demokratike deklaron gjithashtu se Bashkia Tiranë ka ekspozimin më të lartë financiar, me rreth 1.7 miliardë lekë fond limit të klasifikuar “Red Flag”, të shpërndara në 75 procedura prokurimi.
Në listën e bashkive me indikatorë të lartë risku, PD përmend edhe Bashkinë Vlorë, ku rreth 928 milionë lekë, ose 36.5% e fondit total të tenderëve, rezultojnë me indikatorë risku, si dhe Bashkinë Shijak, ku 72.9% e fondit limit të tenderëve është klasifikuar “Red Flag”.
Ndërkohë, sipas të dhënave të paraqitura nga PD, Bashkia Pogradec shënon nivelin më të lartë të ekspozimit relativ në vend, pasi 85.1% e fondit limit të procedurave të prokurimit është klasifikuar me indikatorë risku.
Partia Demokratike kërkon transparencë më të madhe në menaxhimin e fondeve publike dhe verifikim të procedurave që sipas saj paraqesin elementë rreziku për keqpërdorim të parave të qytetarëve.
