Pas rrëzimit nga mazhoranca të kërkesave për ngritjen e komisioneve hetimore parlamentare për çështjen “McGonigal” dhe për ngjarjet e 11 majit, Partia Demokratike ka thirrur një mbledhje të posaçme të grupit parlamentar. Takimi do të zhvillohet të premten, më 31 tetor, në orën 12:00.
Në qendër të diskutimeve do të jetë situata e krijuar në Kuvend dhe reagimi institucional i opozitës ndaj, siç e cilësojnë demokratët, “mohimit të të drejtave kushtetuese”.
Burime nga selia blu bëjnë me dije se drejtuesit e grupit kanë kërkuar pjesëmarrje të plotë të deputetëve, duke e konsideruar mbledhjen me rëndësi të veçantë për vijimin e veprimtarisë parlamentare të opozitës.
Në njoftimin dërguar deputetëve, theksohet:
“Të nderuar kolegë, nesër, e premte, datë 31 tetor, ora 12:00, mbledhje e posaçme e Grupit Parlamentar të PD lidhur me situatën e krijuar në Kuvend me mohimin e të drejtave kushtetuese të opozitës. Lutem të mos ketë asnjë mungesë për shkak të rëndësisë së mbledhjes.”
