Është përmbyllur në Hagë procesi gjyqësor ndaj ish-presidentit të Kosovës, Hashim Thaçi, dhe katër të bashkëakuzuarve, Bashkim Smakajt, Isni Kilajt, Fadil Fazliut dhe Hajredin Kuçit, lidhur me akuzat për pengimin e administrimit të drejtësisë.

Në seancën e fundit, Zyra e Prokurorit të Specializuar kërkoi sërish që të akuzuarit të shpallen fajtorë. Mbrojtja, nga ana tjetër, kundërshtoi përdorimin e transkripteve të prokurorisë si bazë për një vendim dënues.

Avokatja e Thaçit, Sophie Menegon, argumentoi se fajësia nuk mund të mbështetet në masë të gjerë te transkriptet e ZPS-së, pasi personat që i kanë përgatitur ato janë të panjohur dhe mbrojtja nuk ka pasur mundësi t’i marrë në pyetje.

Edhe avokatët e të bashkëakuzuarve të tjerë kërkuan vendime pafajësie. Sipas tyre, klientët e tyre nuk kanë kryer veprat për të cilat akuzohen dhe Prokuroria nuk ka paraqitur prova të mjaftueshme për të mbështetur pretendimet.

Në anën tjetër, Prokuroria pretendon se Thaçi dhe të bashkëakuzuarit kanë ndërhyrë te dëshmitarët dhe kanë penguar administrimin e drejtësisë në lidhje me procesin për krime lufte dhe krime kundër njerëzimit ndaj ish-presidentit të Kosovës.

Me përfundimin e procesit, trupi gjykues pritet të caktojë datën për shpalljen e aktgjykimit.

Ndërkohë, vëmendja mbetet edhe te çështja tjetër ndaj Hashim Thaçit, lidhur me akuzat për krime lufte dhe krime kundër njerëzimit. Për këtë proces, vendimi pritet të shpallet të mërkurën.