Rajoni verior i Italisë, Emilia Romagna, është përfshirë nga përmbytje të rënda për shkak të reshjeve të shumta të shiut gjatë 24 orëve të fundit. Zonat më të prekura përfshijnë Bolonjën, Faneza, Riminin dhe Ravenën, ku lumenjtë kanë dalë nga shtrati pas mbi 200 mm shi që ka rënë nga e mërkura, 19 Shtator.

Lumenjtë Marzeno dhe Lamone kanë vërshuar me forcë, duke përmbytur rrugë, banesa dhe sipërfaqe të tëra toke. Videoja e xhiruar me dron nga zona e Faenza-s, në provincën e Ravenës, tregon dëmet e mëdha që përfshijnë tokë të përmbytur, pemëtari të shkatërruara dhe godina të dëmtuara. Në zonën bregdetare, plazhe publike dhe private janë dëmtuar rëndë.

Niveli i lumenjve mbetet i lartë, dhe kryebashkiaku i Faenza-s, Massimo Isola, ka bërë thirrje për kujdes të shtuar nga banorët, duke këshilluar që të shmangen bodrumet dhe të qëndrohet në katet e sipërme për siguri. Dëmet materiale llogariten në miliona euro, ndërsa autoritetet po vazhdojnë të monitorojnë situatën dhe të ndihmojnë të prekurit.