Nënkomisioni i posaçëm për përzgjedhjen e kandidatëve për anëtarë të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP) nga radhët e avokatëve dështoi dje të zgjidhte me dakordësi emrat që do t’i çohen për votim seancës plenare. Si pasojë, 4 kandidaturat për plotësimin e vakancave në institucionet qeverisëse të sistemit të drejtësisë u zgjodhën me short sipas procedurës ligjore.
Artan Reçi dhe Albens Tabaku janë dy kandidaturat nga radhët e avokatëve që do të votohen për anëtarë të KLGJ, ndërsa Saimir Kola dhe Erind Mërkuri për anëtarë të KLP. Këta kandidatë duhet të marrin 84 vota në seancë plenare; në të kundërt, procesi rifillon sërish në nënkomision. Pas përsëritjes dhe dy herë të procedurës, nëse nuk ka konsensus, të përzgjedhurit për votimin e tretë konsiderohen të zgjedhur.
Ky proces është shoqëruar me debate, pasi opozita e quajti të deformuar dhe akuzoi mazhorancën se po tenton të kapë institucionet e drejtësisë. “Keni deformuar procesin. Është ndërhyrë politikisht në proces nga Sekretari i Përgjithshëm i Kuvendit. Nuk mund të japim konsensus për një proces të deformuar. Më thoni një rast kur keni dalë kundër raportit të Sekretarit të Përgjithshëm. Asnjë rast, sepse ju e përdorni politikisht atë! Ne japim konsensus vetëm mbi kushtetutë. Nëse ju keni përcaktuar kush do të jetë kryetar i KLGJ apo kryetar i KLP, ky është problem i juaj dhe ndërhyrje e juaj. Ne jemi me kushtetutën dhe s’mund të pranojmë këtë ndërhyrje. E din gjithë Tirana, që njerëzit e Engjell Agaçit janë piketuar për kryetar të KLP”, deklaroi Bardhi.
