Durrës, 6 qershor 2025 – Një ngjarje e rëndë është shënuar në fshatin Gos, ku një konflikt për motive të dobëta mes fqinjësh ka përfunduar me përdorimin e armës së zjarrit dhe plagosjen e dy personave.

Policia e Durrësit ka arrestuar në flagrancë shtetasin Sh. O., 56 vjeç, i cili dyshohet se pas një debati verbal ka qëlluar me armë zjarri ndaj dy komshinjve të tij, shtetasve S. D. dhe N. D., duke u shkaktuar plagë të rënda.

Menjëherë pas sinjalizimit, shërbimet e Policisë kanë ndërhyrë në vendngjarje dhe në vijim të hetimeve, kanë zbuluar armën e përdorur në krim, një pistoletë e tipit ende të pacaktuar, e cila ishte fshehur në një mur, brenda perimetrit të banesës së autorit.

Specialistët për Hetimin e Krimeve të Rënda të DVP Durrës bënë sekuestrimin e armës në cilësinë e provës materiale, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për vijimin e hetimeve dhe ndjekjen penale të autorit.

Gjendja shëndetësore e të plagosurve mbetet nën vëzhgim nga bluzat e bardha në spitalin e Durrësit, ndërkohë që Policia po heton për të përcaktuar rrethanat e plota të ngjarjes dhe motivin e saktë të përplasjes që çoi në përdorimin e armës.