Një krim i rëndë ka tronditur Turqinë, ku një burrë u ekzekutua me armë zjarri në orët e para të mëngjesit, teksa po hynte në automjetin e tij në lagjen Esenyurt të Stambollit.

Ngjarja ndodhi rreth orës 05:00, kur Semus Mert K. iu afrua makinës për të hapur derën. Në atë moment, dy persona të panjohur iu afruan, ndërsa njëri prej tyre hapi zjarr duke e qëlluar disa herë.

Pamjet e kamerave të sigurisë kanë fiksuar të gjithë skenën e ekzekutimit. Sipas mediave turke, autori nuk u mjaftua me të shtënat e para, por i dha viktimës edhe një plumb të fundit, duke u siguruar për vdekjen e tij, përpara se të largohej me bashkëpunëtorin në drejtim të panjohur.

Viktima, sipas raportimeve, ishte i martuar dhe baba i një fëmije. Gruaja e tij ishte personi i parë që mbërriti në vendngjarje dhe pësoi një krizë të fortë emocionale pasi pa bashkëshortin të pajetë.

Policia turke ka nisur hetimet për identifikimin dhe kapjen e dy autorëve, ndërsa motivi i ekzekutimit mbetet ende i paqartë. Autoritetet po analizojnë pamjet e kamerave të sigurisë dhe prova të tjera për të zbardhur plotësisht ngjarjen.