Mbrëmjen e 9 majit 2025, rreth orës 21:15, Policia e Dibrës ka marrë një telefonatë nga Xhemal Gjunkshi, kandidat për deputet nga radhët e Partisë Demokratike, i cili ka pretenduar se përfaqësues të Partisë Socialiste po shpërndanin para në këmbim të votave në njësinë administrative Maqellarë.
Menjëherë pas sinjalizimit, në terren është dërguar një grup hetimor i posaçëm nga Drejtoria Vendore e Policisë Dibër, i cili, nën drejtimin e SPAK dhe Prokurorisë së Rrethit, ka nisur veprimet e para hetimore dhe procedurale.
Sipas njoftimit zyrtar të Policisë, çështja është referuar në SPAK për veprën penale “Korrupsioni aktiv në zgjedhje”, ndërsa janë përfshirë edhe “Vetëgjyqësia” dhe “Pengimi i qarkullimit të mjeteve të transportit rrugor”.
Në këtë ngjarje janë proceduar penalisht:
• A.K., 29 vjeç
• H.H., 48 vjeç
• Xhemal Gjunkshi, 62 vjeç, kandidati denoncues nga radhët e PD-së
• E.Gj., 33 vjeç
Policia ka bërë të ditur se hetimet janë në vijim për të sqaruar plotësisht rrethanat e ngjarjes dhe për të verifikuar nëse ka pasur elementë të veprës penale të shitblerjes së votës. Rasti pritet të ketë jehonë për shkak të afërsisë me datën e zgjedhjeve dhe përfshirjes së një kandidati të opozitës si denoncues, por edhe si i proceduar.
