Prokuroria e Tiranës ka përfunduar hetimet për ish-nr.2 të Operacionit Forca e Ligjit, Artan Shkëmbin dhe ka çuar dosjen e tij për gjykim.

Ndaj Shkëmbit është ngritur akuza e zbulimit të akteve sekrete.

Dosja pritet t’i kalojë gjykatës për shqyrtim. Prokuroria kërkon që Shkëmbi të vijojë të mbetet i pezulluar nga detyra.

Fillimisht rasti i Artan Shkëmbit u hetua nga SPAK e cila më pas shpalli moskompetencë dhe ia kaloi Prokurorisë së Tiranës.

Sipas SPAK, nuk provohet të ketë kryer veprën penale të korrupsionit. Prokuroria e Posaçme kundër Krimit të Organizuar dhe Korrupsionit po kryente hetime për Shkëmbin që prej muajit shtator të vitit të kaluar, kur ai u pezullua nga detyra.

Pezullimi i Artan Shkëmbit erdhi pas një informacioni të mbërritur nga drejtësia gjermane, e cila kishte kërkuar hetim dhe bashkëpunim për dy trafikantë shqiptarë, Aleksandër Prronin e Klaudio Vukajn.