Prokuroria e Tiranës ka kërkuar dënimin me 25 vite burg për ish-policin Tomorr Çela, i akuzuar për vrasjen e dy shtetasve, L.H. dhe E.D., pas një konflikti që nisi nga përplasja e makinave në vitin 1997.

Sipas prokurorisë, T.Ç., i cili në atë kohë shërbente në Komisariatin e Policisë Nr. 4 në Tiranë, ka përdorur armën automatike tip Kallashnikov, të cilën e mbante në banesë pa leje, për të qëlluar ndaj viktimave më 27 nëntor 1997, rreth orës 20:30, në lagjen nr. 9, rruga B. Curri. Pas qëllimit me armë zjarri, i pandehuri është larguar menjëherë nga vendi i ngjarjes, ndërsa viktimat vdiqën në vend.

Hetimet kanë zbuluar se tre apo katër ditë para ngjarjes, T.Ç. ishte përplasur me autoveturën ku udhëtonin L.H. dhe E.D., duke shkaktuar dëme të dy makinave. Konflikti që lind nga ky aksident ka eskaluar deri në ngjarjen tragjike me pasoja vdekjeprurëse.

Prokuroria thekson se gjatë hetimeve i pandehuri i është shmangur drejtësisë dhe nuk ka shfaqur pendesë për veprën e kryer. Për shkak të rrezikshmërisë së veprës dhe pasojave të saj, është kërkuar dënimi maksimal për akuzën e “Vrasjes me paramendim” në bashkëpunim, parashikuar nga neni 78, pika 25 e Kodit Penal.

Ngjarja mbetet një nga rastet më të rënda kriminale në kryeqytet nga periudha e vitit 1997, duke rikthyer vëmendjen te hetimi i drejtësisë për veprime të ish-policëve jashtë ligjit.