Për herë të nëntë, banorët e Krujës dhe Fushë Krujës u mblodhën në protestë përgjatë aksit Thumanë-Kashar, duke shprehur pakënaqësitë e tyre ndaj ndërtimit të autostradës që sipas tyre i ka izoluar plotësisht. Banorët kanë bllokuar disa pika të autostradës, duke u përplasur me forcat e policisë. Ata theksojnë se mungesa e hyrje-daljeve në autostradë ka çuar në izolimin e komuniteteve të tyre dhe në falimentimin e bizneseve lokale.

Në një veprim të mëtejshëm, banorët e Thumanës, Krujës, Fushë Krujës dhe fshatrave përreth kanë paraqitur një kallëzim në SPAK, duke akuzuar zv/kryeministren Belinda Balluku, Ministrinë e Energjisë dhe Infrastrukturës, ARRSH dhe institucionet përkatëse për “Shpërdorim të Detyrës”, “Korrupsion”, “Shkelje të Barazisë në Tendera” dhe “Falsifikim të Dokumentave”. Sipas tyre, shkeljet e pretenduara janë bërë gjatë tenderit për autostradën Thumanë-Kashar. Protestuesit kanë firmosur një dokument që pritet të dorëzohet në SPAK për të nisur hetimet mbi këto pretendime.

Ndërkohë, një raport i Bankës Europiane të Investimeve ka nxjerrë në pah diferencat e mëdha të kostove të koncesioneve në Shqipëri krahasuar me ato në vendet e tjera europiane. Raporti citon shembuj nga Çekia dhe Letonia, ku koncesionet për ndërtimin dhe mirëmbajtjen e autostradave kushtojnë nga 14.2 deri në 16.5 milionë euro/km. Në kontrast të plotë, koncesioni për autostradën Thumanë-Kashar në Shqipëri arrin në 61.9 milionë euro/km, një vlerë që është 3 deri në 4 herë më e lartë se projektet e ngjashme europiane.

Projekti i Gener 2 për autostradën, me një kosto totale prej 1.3 miliardë euro për 35 vite, është cilësuar nga protestuesit dhe ekspertët si një barrë e rëndë për qytetarët shqiptarë, duke përfshirë edhe tarifa të larta që do të indeksohen me inflacionin. Ndërsa qeveria shqiptare pritet të sigurojë 22.8 milionë euro si garanci që të mblidhen të ardhurat e planifikuara, kostoja e këtij projekti mbetet shumë më e lartë krahasuar me investimet strategjike të paraqitura në listën e qeverisë për vitet 2019-2020.

Përveç kostove të larta, shqetësimi kryesor i banorëve mbetet siguria e rrugës dhe mirëmbajtja e saj, një proces që shpesh bëhet me vonesa dhe që rrezikon sigurinë e qytetarëve që e përdorin këtë aks çdo ditë.