Opozita shqiptare ka nisur një protestë në kuadër të mosbindjes civile, e cila ka filluar në orën 17:00 në gjashtë pika nevralgjike në të gjithë vendin, duke bllokuar akset rrugore. Kjo protestë pritet të zgjasë tri orë, por nënkryetari i Partisë Demokratike, Luçiano Boçi, i cili ndodhet në Milot, një nga pikat e protestës, deklaroi se do të ketë akte të tjera në ditët në vijim që mund të zgjasin edhe më gjatë.

Boçi tha: “Kjo është mosbindje civile, e cila ka aktet e veta. Është një akt proteste në kuadër të mosbindjes civile. Kërkojmë qeveri teknike, për t’i dhënë fund inkuizicionit politik të opozitës, për t’i dhënë liri liderit të opozitës dhe për të siguruar zgjedhje të lira dhe të ndershme.”

Ai gjithashtu theksoi se protesta mund të zgjatet dhe të shndërrohet në një angazhim më të gjatë: “Do të ketë akte të tjera në vazhdimësi, që mund të jenë më të gjata se tre orë, mund të jenë me ditë të tëra, për t’i dhënë këtij vendi, shqiptarëve, zgjedhje të lira dhe të ndershme.”

Boçi i bëri thirrje policisë që të zbatojë Kushtetutën dhe direktivat që vijnë nga Parlamenti Europian, duke theksuar se protesta e qytetarëve mund të zhvillohet në formën që ata zgjedhin. “Ne kemi zbatuar ligjin duke njoftuar Policinë e Shtetit, e cila, në anën tjetër, duhet të respektojë ligjin,” përfundoi ai.