Pak orë para ndeshjes vendimtare të Shqipërisë ndaj Serbisë në Leskovc, tensionet mes tifozëve nuk kanë munguar.

Përveç heqjes së flamurit shqiptar nga stadiumi, tifozët vendas kanë provokuar ekipin kuqezi edhe në Nish, ku ndodhet hoteli i skuadrës shqiptare. Në rrugët pranë hotelit janë vendosur parrulla të vogla që shfaqin hartën e Kosovës të mbuluar me flamurin serb – një veprim që duket qartë i qëllimshëm për të nxitur tension.

Ky incident vjen pavarësisht thirrjeve të FIFA-s dhe UEFA-s për të mbajtur futbollin larg politikës, por mbështetësit serbë duket se i injorojnë këto kërkesa, duke vijuar provokimet ndaj ekipit shqiptar.

Në sfondin e këtyre tensioneve, përballja e kuqezinjve në “finalen” për vendin në Play Off-in e Botërorit pritet të jetë jo vetëm sfidë sportive, por edhe provë e nervave.