Partia Socialiste i ka drejtuar një letër zyrtare ankesë Komisionit Qendror të Zgjedhjeve (KQZ), duke ngritur shqetësime serioze për procesin e votimit nga jashtë vendit. Në ankesë, PS evidenton një sërë problemesh të raportuara nga qytetarët shqiptarë që jetojnë në Greqi, Itali, SHBA, Angli dhe vende të tjera.
Sipas PS, problemet kryesore janë të lidhura me bashkëpunimin me kompaninë DHL, e cila është kontraktuar për shpërndarjen dhe kthimin e fletëve të votimit. Ndër shqetësimet e ngritura janë:
• Mosrespektim i protokolleve të njoftimit nga ana e DHL, ku qytetarët nuk janë informuar me email apo SMS për dërgesat, veçanërisht në Greqi dhe Itali.
• Vështirësi në kontaktim, me raste kur numrat e DHL rezultojnë “call failed” ose nuk përgjigjen fare.
• Refuzim për të marrë zarfin e kthimit, sidomos në Greqi, ku qytetarët janë detyruar të dorëzojnë fizikisht zarfin në një pikë postare.
• Kërkesa për pagesë për kthimin e zarfit, ndonëse duhet të jetë pa kosto për zgjedhësin.
• Mungesë e fletëve të votimit në disa zarfe, raportuar nga votues në SHBA, Itali, Angli dhe Greqi.
• Shpërndarje e pabarabartë e zarfeve brenda të njëjtës familje, ku disa anëtarë i marrin dhe disa jo.
• Mesazhe për adresë të pasaktë, pavarësisht që adresat janë konfirmuar nga qytetarët.
• Dërgesa pa njoftim paraprak, çka çon në kthim të zarfit pa dijeni të qytetarit.
• Probleme me barkodet e DHL, që nuk njihen nga sistemi në disa pika, si në Brescia, Itali.
PS kërkon që KQZ të ndërhyjë urgjentisht pranë DHL-së dhe të marrë masa të menjëhershme për të zgjidhur këto çështje. “Procesi i votimit nga jashtë duhet të garantojë pjesëmarrje dhe barazi për të gjithë qytetarët,” thuhet në letrën e PS-së, duke kërkuar rikuperimin e fletëve të votimit të munguara dhe një transparencë të plotë mbi ecurinë e procesit.
Kjo ankesë vjen ndërkohë që janë intensifikuar përgatitjet për zgjedhjet dhe pritet një pjesëmarrje më e gjerë nga diaspora.
