MOSKË – Në përvjetorin e katërt të nisjes së luftës në Ukrainë, presidenti rus Vladimir Putin paralajmëroi se çdo sulm kundër Rusisë me përdorim të elementeve bërthamore do të ketë pasoja të rënda. Deklarata erdhi pas shqetësimeve të shprehura nga Shërbimi i Inteligjencës së Jashtme të Rusisë (SVR) për mundësinë e transferimit të teknologjisë bërthamore nga Britania e Madhe dhe Franca drejt Ukrainës.

“Armiku mbështetet në terrorizëm atomik dhe masiv, pasi ka dështuar të shkaktojë një humbje strategjike ndaj Federatës Ruse,” tha Putin, duke akuzuar gjithashtu Kievin për përpjekje për të minuar procesin e paqes. Ai paralajmëroi se Rusia po zhvillon masa të reja në fushën e mbrojtjes dhe politikës për të garantuar sigurinë kombëtare.

Në një mbledhje të bordit drejtues të FSB, ish-KGB-ja ruse, Putin tha se duhet të rritet vigjilenca kundër sabotimeve të mundshme ndaj gazsjellësve Turkish Stream dhe Blue Stream, si dhe kundër sulmeve terroriste që, sipas tij, janë në rritje dhe përgjegjës kryesor është inteligjenca ukrainase.

Zëdhënësja e Ministrisë së Jashtme ruse, Maria Zakharova, paralajmëroi se çdo përpjekje për rishikimin e statusit jo-bërthamor të Ukrainës apo për pajisjen e saj me armë bërthamore do të konsiderohej “hap ekstrem përshkallëzimi”, kërcënuese për regjimin ndërkombëtar të mos-përhapjes së armëve bërthamore.

Një zyrtar rus i cituar nga agjencia RIA shtoi se Moska do të informojë Shtetet e Bashkuara për çdo zhvillim lidhur me shfaqjen e armëve bërthamore në Ukrainë, dhe se çdo përpjekje e Kievit për të siguruar kapacitete të tilla do të ndikojë drejtpërdrejt në qëndrimin e Rusisë ndaj Ukrainës.

Doktrina bërthamore e Rusisë, e përditësuar në vitin 2024, përcakton skenarët mbrojtës ku përdorimi i armëve bërthamore mund të konsiderohet si mjet parandalues, duke nënvizuar gatishmërinë e Moskës për një reagim të fortë ndaj çdo kërcënimi të tillë.