TIRANË – Kryetari i Grupit Parlamentar të Partisë Demokratike, Gazment Bardhi, ka reaguar ndaj vendimit të Gjykatës Kushtetuese për rrëzimin e aktit të parë të Legjislaturës së re të Kuvendit, duke e cilësuar si një dhunim të rregullave të parlamentarizmit dhe një sulm ndaj demokracisë përfaqësuese.

Në një postim në Facebook, Bardhi shkruan se vendimi i GJK cënon lirinë e shprehjes së deputetëve dhe shkel rregullat për thirrjen e mbledhjes së Kuvendit dhe procedurën parlamentare për miratimin e akteve.

“Prej kohësh kemi ngritur shqetësimin për degradimin e Kuvendit. Organi më i lartë kushtetues në vend po sillet si një strukturë njëpartiake, që shpërfill rregullat e bashkëjetesës mes forcave politike dhe imponon vendime pa debat të mirëfilltë, thjesht me forcën e kartonit. Ky nuk është parlamentarizëm. Ky është banditizëm,” thekson Bardhi.

Deklarata e tij vjen ndërsa opozita vijon të kritikojë mënyrën e funksionimit të Kuvendit dhe përqendrimin e vendimmarrjes në shumicën qeverisëse.