Qeveria shqiptare ka në plan të ndryshojë sërish buxhetin e shtetit për vitin 2024. Sipas informacionit të siguruar nga Kapitali, në mbledhjen e radhës, Këshilli i Ministrave do të miratojë një Akt Normativ që do të bëjë rishpërndarjen e fondeve buxhetore, kryesisht për investimet. Detajet e ndryshimeve mbeten ende të panjohura, por burime të afërta me procesin kanë bërë të ditur se Akti Normativ do të alokojë më shumë fonde për projekte si Unaza e Madhe e Tiranës dhe rruga Elbasan-Qafë Thanë.

Ky është hera e dytë brenda këtij viti që qeveria ndryshon buxhetin përmes akteve normative. Herën e parë, në muajin shkurt, Këshilli i Ministrave rriti planin e të ardhurave me 110 milionë euro dhe shpenzimet me 70 milionë euro, duke ulur kështu defiçitin buxhetor të programuar për këtë vit. Ky ndryshim alokoi 40 milionë euro për garancinë sovrane të bizneseve fason dhe 98 milionë euro për financimin e ndërtimit të Portit të Ri në Porto Romano.

Përmes ndryshimeve të reja, që pritet të prekin nivelin 200 milionë euro, do të përfitojnë kryesisht investimet në infrastrukturë. Pjesë e këtyre ndryshimeve pritet të jetë financimi shtesë për projektet e Unazës së Madhe dhe rrugës Elbasan-Qafë Thanë. Po ashtu, është e mundur që në buxhetin e ri të përfshihen edhe rritjet e kostove për projekte madhore si hekurudha Tiranë-Durrës dhe ndonjë projekt të ri, i përfoluri deri tani është ai i rrugës Elbasan-Lekaj.

Për vitin 2024, qeveria ka planifikuar të mbledhë 6 miliardë e 870 milionë euro nga taksat dhe burime të tjera financiare, ndërsa shpenzimet totale janë programuar në 7 miliardë e 440 milionë euro. Të dhënat zyrtare nga Ministria e Financave tregojnë se për gjashtë muajt e parë të vitit, arka e shtetit ka akumuluar një sufiçit prej mbi 500 milionë eurosh, si rezultat i rritjes së të ardhurave dhe mosrealizimit të shpenzimeve sipas planit.