Në një fjalë të mbushur me emocion dhe ironi, kryeministri Edi Rama kujtoi me dhimbje ndarjen nga jeta të Fatos Nanos, duke rrëfyer marrëdhënien e ndërlikuar, por plot respekt që kishte me ish-kryeministrin dhe themeluesin e Partisë Socialiste.
“I thonë një fjalë – vdis pa të të dua. Sa do të doja të uleshim sonte në një nga darkat e rralla të viteve të fundit dhe të kalonim deri vonë në revistën e ngjarjeve që pas lajmit të ndarjes tënde nga jeta. Po sa të paskan dashur, more burr i dheut,” – tha Rama me një ton të përzier mes mallëngjimit dhe sarkazmës.
Ai shtoi se “edhe ata që dikur e akuzuan, e sulmuan dhe e futën në burg, sot nuk ngurrojnë të qendisnin fjalë të bukura për të”, duke nënvizuar se hipokrizia shpesh shfaqet vetëm pasi dikush largohet nga jeta.
Rama përfundoi fjalën e tij me trishtim të thellë:
“Nuk të mendoja kurrë të shtrirë në një arkëmort. Erdh kjo ditë zie për mua, dhe më ra barra e rëndë të jap lamtumirën e fundit paraardhësit tim, të parit kryetar të familjes sonë politike.”
