Kryeministri Edi Rama mori pjesë sot në Vjenë në konferencën prestigjioze të nivelit të lartë “Time To Decide Europe 2025”, një forum që mblodhi liderë politikë, ekspertë të diplomacisë, ekonomisë dhe sigurisë për të diskutuar mbi sfidat dhe të ardhmen e Europës.

Rama ishte i ftuar nderi dhe drejtoi një nga panelet kryesore të konferencës, si dhe kontribuoi në konkluzionet përfundimtare të takimit. Ai theksoi rëndësinë e këtij forumi për trajtimin e çështjeve kyçe që lidhen me zgjerimin, sigurinë, zhvillimin ekonomik dhe rolin global të Bashkimit Europian.

Në postimin e tij në rrjetet sociale, Kryeministri shkroi: “Ishte privilegj të merrja pjesë si i ftuar nderi në drejtimin e njërit prej paneleve, si edhe në konkluzionet përfundimtare”, duke ndarë pamje nga aktiviteti në Vjenë.

Konferenca “Time To Decide Europe 2025” është një nga takimet më të rëndësishme të politikëbërësve europianë, duke shërbyer si platformë diskutimi për të ardhmen e kontinentit.