Kryeministri Edi Rama zhvilloi këtë të premte një takim me ekspertët e financave, ku në qendër të diskutimit ishin prioritetet strategjike për rrugëtimin e Shqipërisë drejt Bashkimit Europian deri në vitin 2030.

Në fjalën e tij, Rama theksoi rëndësinë e “Paqes Fiskale”, një iniciativë e re që synon stabilitet ekonomik, ulje të informalitetit dhe përmirësim të marrëdhënies mes shtetit dhe biznesit.

“Është shumë e rëndësishme që ‘Paqja Fiskale’ të hartohet dhe të përmbyllet me sukses në aspektin konceptual deri në fund të këtij viti, në mënyrë që vitin e ardhshëm të fillojmë me zbatimin e saj. Kam besim se, nëse ajo konceptohet dhe planifikohet siç duhet, do të jetë një mesazh pozitiv për sipërmarrjen dhe do të ndihmojë në rritjen e të ardhurave në buxhetin e shtetit,” – u shpreh kryeministri.

Rama shtoi se ulja e informalitetit dhe rritja e performancës fiskale mbeten pika kyçe të reformës ekonomike, duke theksuar se “bashkëpunimi me biznesin është thelbësor për suksesin e saj”.

Ndërkohë, ministri i Financave, Petrit Malaj, theksoi vizionin afatgjatë të qeverisë për të ndërtuar një ekonomi të qëndrueshme e konkurruese:

“Qëllimi ynë është i qartë dhe ambicioz. Përmes kombinimit të politikave të shëndosha fiskale e monetare, reformave strukturore dhe investimeve strategjike, ekonomia shqiptare do të garantojë një trajektore të re zhvillimi të qëndrueshëm,” – deklaroi Malaj.

Diskutimi me ekspertët është pjesë e një procesi të gjerë konsultimi që synon përcaktimin e strategjisë ekonomike të Shqipërisë për dekadën e ardhshme, në përputhje me standardet dhe objektivat e integrimit europian.