Paralajmërimi i kryeministrit Edi Rama për një reformë të thellë në administrimin e pronave është shoqëruar me akuza të forta ndaj drejtimit të Agjencisë Shtetërore të Kadastrës (ASHK).

Gjatë konferencës rajonale “Nga Prona tek Progresi”, të zhvilluar dy ditë më parë, Rama deklaroi se qeveria synon bashkimin e disa agjencive, përfshirë ASHK-në dhe Agjencinë e Trajtimit të Pronave (ATP), me qëllim krijimin e një administrate të unifikuar për pasuritë e paluajtshme.

“Sepse të pasurit e agjencive të veçanta dhe të ndara nuk e kanë ndihmuar procesin… Tani, besoj se kemi një ide të qartë dhe të mirë se si ta formësojmë administratën e pasurive të paluajtshme nga A-ja tek Zh-ja, me bashkimin e një sërë agjencish në një”, u shpreh Rama.

Në të njëjtën konferencë ishte e pranishme edhe drejtoresha e ASHK-së, Lorena Goxhobelli.

Ndërkohë, një artikull i publikuar nga media Pamfleti ngre akuza të forta për mënyrën e emërimeve në ASHK, duke u ndalur te drejtori i Drejtorisë së Kadastrës dhe Monitorimit të Titujve të Pronësisë, Ardit Kasemi.

Sipas këtij publikimi, Kasemi është emëruar në këtë detyrë rreth nëntë muaj më parë, pavarësisht se, sipas medias, nuk kishte eksperiencë në fushën e kadastrës dhe më herët kishte punuar në Drejtorinë Rajonale të Sigurimit Shëndetësor.

Artikulli pretendon gjithashtu se në CV-në e tij nuk është përfshirë eksperienca e mëparshme si kamarier në një lokal në Tiranë, duke shtuar se emërimi i tij ka ngjallur reagime brenda institucionit.

Po sipas Pamfletit, Ardit Kasemi është vëllai i Arbies Kasemit, për të cilin media pretendon se ka lidhje me biznesmenin Gëzim Hoxha dhe kompanitë “First” dhe “Intelisoft”, emra që janë përmendur edhe në raportimet lidhur me dosjen e AKSHI-t.

Në artikull përmendet gjithashtu se babai i tyre, Hamit Kasemi, ushtron funksionin e Oficerit të Policisë Gjyqësore në Prokurorinë e Përgjithshme.

Artikulli mbyllet me kritika ndaj drejtimit të ASHK-së, duke pretenduar se emërimet në pozicione kyçe nuk janë bazuar te meritokracia dhe eksperienca profesionale.

Deri në këtë moment nuk ka një reagim publik nga ASHK, drejtoresha Lorena Goxhobelli apo Ardit Kasemi lidhur me këto pretendime.