Tirana u përfshi dje nga protesta e 39-të radhazi, ku qytetarët dolën sërish në shesh për të shprehur pakënaqësinë ndaj qeverisë dhe për të kërkuar ndryshime politike.

Në nisje të tubimit, një nga protestueset mbajti një fjalim, ku ndau mesazhin e saj për protestat dhe u bëri thirrje institucioneve më të larta të shtetit që të ushtrojnë kompetencat kushtetuese.

“Kjo protestë më mësoi t’i them frikës stop,” u shpreh ajo, duke vlerësuar qëndresën e qytetarëve që prej javësh marrin pjesë në protestat e zhvilluara në kryeqytet.

Protestuesja tha se, sipas saj, thirrjet drejtuar kryeministrit Edi Rama nuk kanë sjellë rezultat dhe kërkoi reagimin e Presidentit të Republikës dhe Gjykatës Kushtetuese.

“Dua t’u bëj një thirrje presidentit dhe Gjykatës Kushtetuese. Ramës i kemi bërë boll thirrje dhe nuk është përgjigjur. Për çfarë janë presidenti dhe GJK, për të mbrojtur Kushtetutën apo për ta hedhur poshtë?”, deklaroi ajo.

Gjatë fjalës së saj, protestuesja kritikoi edhe mënyrën se si, sipas saj, janë trajtuar pjesëmarrësit në protesta, duke iu referuar ndalimit të disa aktivistëve.

“Në vend që të arrestohet Rama, arrestoi protestuesit dhe i mbajti nën arrest 72 orë. Presidenti dhe GJK të marrin masa, sepse janë për mbrojtjen e kombit! Të mbrosh njeriun që ka hedhur poshtë si qenie njerëzore ky”, u shpreh ajo.