Protestat që prej më shumë se një muaji po zhvillohen në Tiranë kundër kryeministrit Edi Rama kanë sjellë edhe forma simbolike të reagimit nga qytetarët.

Një pensionist ka zgjedhur t’i japë “kartonin e kuq” kryeministrit, duke e cilësuar këtë si një mesazh se ai duhet të largohet nga drejtimi i vendit.

“Protestojmë për një mijë e një të zezat e Ramës. Kemi vendosur me i dhënë një karton të kuq Edi Ramës. Është i përjashtuar për mos me luajtur më kurrë për Shqipërinë. Është i dënuar prej popullit shqiptar, prej Europës dhe gjithë botës”, u shpreh ai.

Qytetari u bëri thirrje protestuesve që, sipas tij, të zbatojnë simbolikën e “kartonit të kuq”, ndërsa ngriti shqetësimin edhe për gjendjen ekonomike të pensionistëve.

“Zbatoni ligjin e kartonit të kuq, ta vëmë në jetë. Pensionistët shqiptarë janë të lodhur. Janë edhe të frikësuar. Paratë e pensionit nuk na dalin as për ilaçe, kurse 10 mijë euro me lanë makinën Balluku”, deklaroi pensionisti gjatë protestës.