Shqipëria dënon ashpër sulmin e Iranit ndaj Izraelit. Në një postim në rrjetin social X, Rama shpreh shqetësimin se ky sulm përbën një kërcënim për të destabilizuar rajonin në mënyrë të pakthyeshme. “Mbështesim plotësisht përpjekjet e partnerëve tanë për normalizimin e situatës. Shqipëria thekson nevojën kritike për armëpushim në Gaza”, shkruan Rama në postim.

Edhe ministri i jashtëm i Shqipërisë, Igli Hasani nënvizon se ky përshkallëzim është një kërcënim i rëndë për sigurinë e Izraelit dhe të gjithë rajonit. “Rrezikon të sjellë paqëndrueshmëri dhe shkatërrim më të madh në të gjithë Lindjen e Mesme”.

Reagimi erdhi nga Presidenti Begaj. Shqipëria dënon ashpër sulmin e paprecedentë të Iranit ndaj Izraelit dhe shpreson se nuk do të ketë përshkallëzim të mëtejshëm. “Çdo përshkallëzim i mëtejshëm mund të rrezikojë paqen dhe sigurinë në Lindjen e Mesme dhe të ketë efekte të pakthyeshme në një shkallë më të gjerë”, shkruan Presidenti Begaj në një postim në X.