Paris, 30 qershor – Një numër rekord alarmesh për nxehtësi janë në fuqi në të gjithë Francën, ku 84 nga 96 departamentet kontinentale janë nën alarm portokalli, niveli i dytë më i lartë në vend. Ministrja e Klimës, Agnès Pannier-Runacher, e ka cilësuar situatën si “të paprecedentë”, duke paralajmëruar për rreziqet e mëdha që sjell vala ekstreme e nxehtësisë.

Në Evropën jugore dhe lindore, përfshirë pjesë të Spanjës, Portugalisë, Italisë, Gjermanisë, Mbretërisë së Bashkuar dhe vende të Ballkanit si Kroacia, janë në fuqi paralajmërime të ngjashme për temperatura të larta, të cilat kanë thyer rekorde historike gjatë fundjavës së kaluar.

Në Spanjë, në zonën e Andaluzisë, qyteti El Granado regjistroi temperaturën ekstreme prej 46 gradë Celsius të shtunën, ndërsa në Portugalinë qendrore, në qytetin Mora, u matën 46.6 gradë Celsius të dielën – temperatura më të larta që janë regjistruar ndonjëherë në muajin qershor për këto vende.

Ekspertët paralajmërojnë se këto temperatura të larta sjellin rreziqe serioze për shëndetin publik, sektorin energjetik dhe përqëndrimin e zjarreve në pyje, duke kërkuar nga qytetarët që të marrin masa të kujdesshme dhe të shmangin ekspozimin e gjatë në diell.